སྤྲོས་མེད་ནང་གི་བསང་མཆོད་ཅིར་སྣང་རྒྱན་ཤར།

༄༅། །སྤྲོས་མེད་ནང་གི་བསང་མཆོད་ཅིར་སྣང་རྒྱན་ཤར་བཞུགས། རང་རིག་སྐུ་གསུམ་ལྷ་ལ་འདུད། །རྣལ་འབྱོར་སྤྱོད་པ་ཀུ་སཱ་ལིས། །ཀུན་རྫོབ་སྤྲོས་བཅས་མ་ལྕོགས་ན། །སྤྲོས་མེད་དོན་གྱི་བསང་མཆོད་བྱ། །ན་མོ། རང་རིག་སྐུ་གསུམ་ལྷ་ཚོགས་ལ། །རང་ངོ་ཤེས་པས་སྐྱབས་སུ་མཆི། །འགྲོ་ཀུན་ཡེ་ནས་སངས་རྒྱས་པའི། །མཉམ་པ་ཆེན་པོར་སེམས་མཆོག་བསྐྱེད། །ཀ་དག་སྤྲོས་པ་བྲལ་བའི་ཀློང་། །ལྷུན་འགྲུབ་འགགས་མེད་རོལ་པའི་སྤྲིན། །སྣང་སྲིད་ལྷ་དང་གཞལ་ཡས་ཁང་། །འོད་གསལ་ཐིག་ལེ་གཅིག་ཏུ་རྫོགས། །རིག་སྟོང་སྐྱེ་མེད་གོས་དཀར་མོས། །གཟུང་འཛིན་རྣམ་དག་གཏོར་ཆུང་དང་། །དུག་ལྔ་རང་གྲོལ་མཁོ་དགུའི་རྫས། །ཚོགས་བརྒྱད་དག་པའི་གསེར་སྐྱེམས་ཕུད། །བདེ་བ་ཆེན་པོའི་ཀློང་དུ་བསྲེགས། །ཡེ་ཤེས་ཆེན་པོར་བྱིན་གྱིས་བརླབས། །བདེ་གསལ་མི་རྟོག་བསང་མཆོད་འདིས། །ངོ་བོ་ཀ་དག་ཆོས་ཀྱི་སྐུ། །རང་བཞིན་ལྷུན་གྲུབ་ལོངས་སྤྱོད་རྫོགས། །རིག་རྩལ་མ་འགགས་སྤྲུལ་པའི་སྐུ། །དཀོན་མཆོག་སྲི་ཞུའི་མགྲོན་རྣམས་ལ། །ཡེ་གྲོལ་ཆེན་པོའི་བསང་མཆོད་འབུལ། །རྩོལ་བྲལ་བློ་འདས་བྱིན་གྱིས་རློབས། །སྣང་བ་ཐབས་མཆོག་ཕོ་རྒྱུད་དང་། །སྟོང་པ་སྐྱེ་མེད་ལྷ་མོའི་ཚོགས། །གཉིས་མེད་མཉམ་ཡངས་མ་ནིང་སྡེ། །མགོན་པོ་ཡོན་ཏན་མགྲོན་རྣམས་ལ། །བདེ་སྟོང་ཟག་མེད་བསང་མཆོད་འབུལ། །གཟུང་འཛིན་དགྲ་བགེགས་དབྱིངས་སུ་སྒྲོལ། །ཁྱད་པར་རྟེན་འབྲེལ་བཅུ་གཉིས་དང་། །རླུང་སྦྱོར་འཕོ་བ་གནས་དག་པའི། །བོད་སྐྱོང་བརྟན་མ་བཅུ་གཉིས་དང་། །དགེ་བསྙེན་ཉི་ཤུ་རྩ་གཅིག་སོགས། །དབེན་ནས་ཆོས་འཁོར་སྲུང་མ་དང་། །འགོ་བའི་ལྷ་ལྔ་སྐྱོབ་པའི་མགོན། །ཁ་འཛིན་སྡོང་གྲོགས་མི་གཡེལ་བའི། །སྣང་སྲིད་ལྷ་སྲིན་ཚོགས་རྣམས་ལ། །ཤར་གྲོལ་རིག་པའི་བསང་མཆོད་འབུལ། །རྩོལ་བྲལ་ལས་བཞིའི་ཕྲིན་ལས་སྒྲུབས། །རང་རིག་བདེ་གཤེགས་སྙིང་པོ་ཉིད། །བདག་གཞན་གཉིས་སུ་འཛིན་པ་ལས། །བག་ཆགས་གསུམ་གྱི་སྦུབས་འཐུམ་པའི། །རིགས་དྲུག་སྙིང་རྗེའི་མགྲོན་རྣམས་ལ། །སྟོང་ཉིད་སྙིང་རྗེའི་བསང་མཆོད་འབུལ། །ཚོགས་གཉིས་རྫོགས་ཏེ་སྒྲིབ་གཉིས་བྱང་། །སྐུ་གཉིས་འགྲུབ་པའི་སྐལ་ལྡན་གྱུར། །རྣམ་རྟོག་རང་གར་ཤོར་བའི་གཟུགས། །བགེགས་རིགས་ལན་ཆགས་མགྲོན་རྣམས་ལ། །འབྱུང་ལུས་ཤ་ཁྲག་ཚོགས་སུ་སྦར། །བདེན་མེད་རྟོགས་པའི་བསང་མཆོད་འབུལ། །སྣ་ཚོགས་ཉམས་ཀྱི་ཤུན་པ་ཕྲལ། །དུག་ལྔའི་རྟོག་ཚོགས་རང་སར་གྲོལ། །བློ་འདས་འོད་གསལ་རྫོགས་པ་ཆེའི། །མཉམ་རྫོགས་ཆེན་པོའི་གྲུབ་མཐའ་སྙེག །གཞན་ཡང་མི་ཤེས་བག་མེད་པས། །བཅས་དང་རང་བཞིན་ཉམས་པ་ཡི། །སྡིག་ལྟུང་ཉོན་མོངས་དྲི་མའི་དཔུང་། །མེད་ཕྱལ་ལྷུན་གྲུབ་གཅིག་པུ་ཆེའི། །ཡེ་སྲུང་ཆེན་པོ་བཞི་རུ་བསང་། །ཐམས་ཅད་ཀ་དག་ཆོས་སྐུའི་ཀློང་། །ཡེ་ཤེས་ཆེན་པོའི་མདངས་ཤར་བའི། །འཁོར་འདས་མགྲོན་རྣམས་གཉུག་མའི་གཤིས། །བློ་བྲལ་ཆེན་པོའི་ཀློང་དུ་ཨཱཿ། །དགེ་བས་བདག་གཞན་འགྲོ་བ་ཀུན། །གཞི་ལས་རིག་པ་ཤར་བའི་ཚེ། །རང་ངོ་ཤེས་པའི་དཔའ་གདེང་གིས། །གདོད་མའི་བཙན་ས་ཟིན་པར་ཤོག །སྤྲོས་མེད་ནང་གི་བསང་མཆོད་འདི། །སྔགས་བཙུན་པདྨ་བི་ཛ་བདག །བོད་ཡུལ་དབུས་སུ་བགྲོད་པའི་ཚེ། །མཚན་བཅས་སྤྲོས་པ་མ་ལྕོགས་པས། །མཉམ་བཞག་ལྟ་བའི་གདེང་བསྐྱེད་ཅིང་། །རྗེས་ཐོབ་སྒྱུ་མའི་རོལ་རྩེད་ལས། །མདོ་ཁམས་ལྷ་སྒང་རིང་མོར་བཀོད། །ཀུ་སཱ་ལི་པའི་དགའ་སྟོན་མཛོད། །དགེ་བས་འགྲོ་ཀུན་ཡོངས་གྲོལ་ཤོག །